暗食熱評

快餐冒險:官圖極限好,實物是??

俗話都有云【官圖無限好,實物是殘渣】,在這方面,泰山北斗級,相信老麥一定可以佔一席位。鏡仔周終於玩完,麥炸雞被食到快絕種,前夫食到恐雞症之後,老麥照顧番佢既粉絲,推出官圖極限好系列,一睇張相,相信每一個快餐冒險家都會無比興奮。

注意:產品資料只供參考,一切以有關品牌為準。

Well,開餐之前,一定有人問:咦,你條友唔係減肥咩?不過,問得哩句,就知你新來,本家減肥邊次唔食麥當勞?今輪減足25磅期間,更有一餐怒食六件炸雞的壯舉,開定個坑,之後分享下我點樣硬食原個大Pizza,連食六餐快餐,一周三餐任食火鍋加餐自助餐都照減到肥的秘方。

今期個名直頭係以為模錯門口的【Signature Tasting Menu】,重心主打係三重芝士安格斯,號稱130g安格斯牛肉,即係平時隻芝士安格期加多少少嘢,副菜有園園蔬菜批,睇樣即係三色豆批啦,甜品有焦糖燉蛋味麥旋風,睇相無限好,Well,俾到五成要還神。

搭配有紅茶花傳特飲,這個像真度應該不成問題,可惜我減肥第一大戒甜飲,無得搞,照飲老麥第一飲品檸茶。芝士調味粉張相,一睇已經笑咗。
好啦,開餐,用埋老麥App平幾蚊,結果我要以下幾樣嘢加焦糖燉蛋味麥旋風,要近七十銀,肯定唔係貴,但,平唔平就要食咗先講。

睇樣,未開盒之前,唔錯。抽蛋未抽之前梗開心。

廢咗好耐既薯條,這次挺四正,要感恩。

茄汁三色豆批,罐頭湯風味,唔討厭三色豆,都唔錯,勝在唔係甜批,對減肥相對好一些。檸茶是老麥最好的飲品,如果發揮到金黃色的黃金檸茶時,味道是一流,不過,哩杯,似鐵銹色,味道很俗,勝在可以不加糖,算啦。

重點來了,個包,其實老麥的安格斯系列,之前以高C/P值聞名,真係做到快餐價錢,專門店都未必俾到既享受,不過早兩次賣到斷市之後,品質急降,大不如前,官圖極限好之下,包裝執正。

打開,個包形都靚,三重芝士主要多了上面兩大炸厚粉芝士,和頂頂的白芝醬,白芝醬味道好淡,似顏色,兩大件炸厚粉,味道就麻麻,勝在頂肚,達到快餐最基本的充飢目的,至於個包,點解可以咁Dry?未食睇相都睇到咁Dry,入口就你睇到既感覺囉。

最後,減糖其間竟然來這款【焦糖燉蛋味麥旋風】,重甜有油感,作為一隻生物學上歸為智人種的動物,就算明知其完全無益,但身體本能不可能不說好,很本能的味道,就是甜,爆甜,層次有一丁點,深度說不上很多,官圖如其說是用來幻想,不如直接當妄想,但,實物再渣,的確能不折不扣地呼喚甜癮,減肥相當不利。

完了吧,如無意外,哩套官圖極限好,完全唔抵,浪費金錢事少,浪費Quota事大,無減肥要求既朋友,去冒險應該都唔差,我的話,暴食麥炸雞應該比較開心。

發佈留言

發佈留言必須填寫的電子郵件地址不會公開。 必填欄位標示為 *