花園酒家任食火鍋：藍妹，雞子，海鮮……總之，麻甩無雙

比起中式火鍋，日式牛鍋，台式火鍋才是心頭好，酒樓火鍋絕非心水，不過，很多前輩喜歡，也只能跟大隊奉陪。某前輩介紹了一次花園酒家任食火鍋，成了少數我自己會去的酒樓火鍋，簡單四個字：多款，抵食。

地址在油麻地，地區一流，勁方便，雖然難脫街坊酒類Feel，但大抵算光猛，算乾淨，目測真係算係咁，至於碗碟之類，食客行規自己都會洗洗先開餐，入鄉隨俗啦。

注意：定價及食物資料只供參考，一切以有關商號為準。

定價，二百多，任食任飲，有汽水，有啤酒，而且是藍妹，兩個字：良心，其實重有餐酒任飲，不過，果D酒，唔好話飲，見到都頭痛，現實啲，飲番大熱藍妹或者綠茶啦。

醬料區赤裸裸，咩都有，味精都俾埋你自己落，幾重口味都可以，夠晒 Open！

任食的款式多到痴線，而且每次來的份量都不算少，如果不熟，一樣先試一份就好。

此店一大優點，是感覺很麻甩，很誠實，一開始送來的蝦和蠔，毫無掩飾的省工夫，隻蠔起晒冰，【食家】們又會嫌三縑四，OK，的確不好，但看到場中氣氛，其實都幾配合，加上重口味醬料，煮熟加醬，有幾多人真係分到？蝦其實不賴，最少算是鮮甜。

湯底很兩極，麻辣或者沙爹之類太濃，芥菜豬骨之類又太淡，我覺得點淡些，自己加料吧，大不了，加味精，【食家】又有意見？香港有幾家食店真的完全不用味精？裝修好些或者酒店內的餐廳用是技術？街坊平民用就是原罪？

雖然都在嫌棄，但此店的食材著實不差，牛肉源源快速供應，解凍明顯沒有做好，但品質不差，但我敢說比大多數 日式牛鍋店的入門級都好不少，上桌完整，亦不會太肥，味道不過不失，煮好後亦不會變爛地布，交足貨的。

比起牛，一系列海鮮和奇怪嘢才是賣點，雞子，花膠之類，冷門嘢最驚唔新鮮，但看上菜，外表OK，吃過數次，有交代的，睇價錢，品質直頭感動。其實更有些點心可選，但我習慣火鍋不點心，就不管了。不嫌重口味，唔計普通豬牛羊，特別推介鍋料有：生魚片，雞子，豬肚，田雞，豬肺，魚肚，龍躉件，醉雞翼，魚鰾，水魷，牛柏葉，脆鯇。十二種，一樣一碟都好多…….

不能不提，招呼是喜出望外的好，粗粗魯魯在所難免，細心跟貼亦屬妄想，但上菜快而準，各種跟進都足，職員禮貌意外算好，比不少囂張系的所謂酒店食肆有更佳服務態度。整體感覺，是個善良市井的粗人，很麻甩很直白，粗枝大葉中，亦有它細心之處，精緻精美就沒有了，抵玩抵食，食材品質亦不算差，這價錢吃兩小時，有海鮮，有奇怪料，又有飲品任飲，重想更多要求？也實在太香港人了吧？

唔敢話百份百安全，但這兩三個月跟不同前輩和友人光顧過好幾次，最少無不適。

地址：油麻地彌敦道469號