譚仔香茜皮蛋米線 ： 超茜不能，填海最強
芫荽，又叫香菜，香茜，常用食材，小時候一直相安無事，但不知是否DNA變異，外星人陰謀之類，近年新新人類多很都吃不到芫荽，甚至稱其為臭荽，網上討伐不斷，身為古老石山，當然是荽人，喜見各大食店跟網民對著幹不斷推出荽嘢。 譚仔香茜皮蛋米線 ，出擊。
又到話題不斷的譚仔，今輪推出譚仔香茜皮蛋米線，Well，聽落吸引，但看到漫天廣告，打定輸數，快餐與現實，大家懂的。
我這碗是減米線的，賃格可能跟正常有點出入，加上所謂芫茜山(加三蚊)和皮蛋海(加十蚊)，湯再加辣，總之就係咁課金啦。
首先要讚，個香茜皮蛋魚湯底係正既，鮮甜，加辣更香口，非常值得一試，其他米線轉哩個湯都應該好正。脆肉鯇質素都好高，肉質佳又夠味道，不過……得果三片仔仔仔，又細細細，實在唔厚道。
芫茜山，Well，山？頂多叫茜，未有未有耐係超茜，咁既實力，一定俾菲利打死，要變超茜，我覺得起碼要果碟仔加三倍，叫山叫超才夠氣勢。至於皮蛋海呢，個海，Well，為咗食客好，應該填咗，份量唔算少，但亦難稱為海，質量都係咁上下，唔差，但近來食慣開源皮蛋，始終有段大大距離。
其實唔差，最少個湯堅係OK，米線係正常，價錢唔算抵食，但都算大眾化，茜人唔好咁大期望，佢唔夠打宇宙帝王，頂多只夠欺負地球戰士。
因為減肥，飲不到汽水，芫茜特飲留番其他勇者，不過根據之前飲日本包裝荽水的經驗，都係果D嘢，唔會有咩特別。
