奴隸獸警世名言集
以我多年觀察，奴隸獸法則通常都是，早期越威威，後期越鵪鶉，之前攞晒威，收尾實聽虧。今次謹送上一些奴隸獸友的名言，當中包括不少獸Flag，大家可以參考一下，慎之慎之。
「女人結婚後做咩改變咁多？」
奴隸獸K結婚後半年的問題，K君為什麼會變成奴隸獸？這問題很大程度已經說出答案……
「我已經死了！」
奴隸獸S君結婚後一個月所發的名言，其後S君失去聯絡，生物學上，我非常有理由相信他仍然存在於人世間，但由精神角度，相信S君已經離我們而去，謹祝佢餘生幸福，雖然佢應該冇咩機會睇見。
「我是荒野中的一匹狼，點會被困？」
友人F婚後一個月的勁爆發言，注意，這是經典奴隸獸Flag！發言至今，六年，他還是一匹狼，動物園困在鐵籠兼牙都被脫掉那種，一個月有一日出街Quota，約佢落佢樓下飲杯嘢聚聚舊都會發出經典叫聲「唔~~方~~便~~呀」。這句，真心，千萬不要亂講。
「佢條友(指其他奴隸獸)削就削啦，我點會好似佢咁折墮，出街要計Quota？」
奴隸獸P 結婚前約一年的豪言壯語，結果，佢真係做到唔洗申請PASS，皆因連出街Quota都冇呀，陰公！充份應驗聲越大，死越快的民間智慧。
大部份奴隸獸的豪言壯語，都沿於不了解事實而陷入自我幻想之中形成，於是就出現本來小乖乖，轉眼哥斯拉的慘況。要避免成為奴隸獸，睜開眼，想好好，別只在眼中自我妄想，戀愛和人生從來不是追到女就已經Goal，追到女就Good End的，叫戀愛遊戲，別搞錯。
