另類茶樓回憶：「齋~~~鹵味！」與「漢堡包」
原本這篇不想復刻，但2021年的世界，原來我更懷念這文中的美食，原來我們離他們更遠，更甚，是酒樓也開始離我們越來越遠了。
「齋~~~鹵味！」，一定要出自點心車神之口，個「齋」字要拖成兩個音，有點似【渣你】，鹵味兩者圓滑有力，方為正宗！亦係我兒時最深刻的茶樓回憶之一。小時去幾家市井茶樓，負責點心者的阿姐，都不約而同地「齋~~~鹵味！」一番，今時今曰，點心車買少見少，「齋~~~鹵味~~」此招來絕技，相信已經失傳。又講起先覺，其實係茶樓，連齋鹵味都少見了！
講開點心車，今時今日已經唔再流行，大多數茶樓都係畫飛仔，勝在唔會車來車去都係唔知點解係大點既咖哩魷魚同鳳爪，但好多騎呢點心亦都失傳。話說兒時曾到過旺角一間茶樓，佢竟然推車仔有以下幾款”點心”：焗豬扒飯、咖哩牛腩飯同萄國雞飯，你無睇錯，的確係車仔貨。又有間茶樓，午茶可以食食下叫三文治或者凍檬茶，茶樓茶餐廳二合一，又或者叫份油多，加上鳳爪一齊食都得，激Fusion！
不過，最深印象的騎呢食物，應該係漢堡包，當你飲住水仙，食緊燒賣，後面個阿姐忽然爆一句「漢堡包、薯條」，認真搞事，更搞笑，係阿姐會同你講：「超點好抵食！」，事實上，超點要成二十幾蚊，所以應該回應阿姐講：「超！點抵食？」。有包都唔奇，最臨呢係個包上面重要插多枝國旗，係茶樓食一個舊住法國旗的漢堡包，應晒小學社會科課本(而家要叫通識)果句：「香港華洋雜處，文化交融」。唔應該出現的會出現，應該出現的又唔可以用應有樣子現身，灌湯餃應該湯在餃內，但永遠，大家只會看到在上湯中浮屍的遇溺餃。
重有一個現代出現的情況，就係甜品類大縮水，以前經常會有四式糖水的點心車，今時今日，好多茶樓，茶市得一兩款糖水，重未計焗布丁、西瓜盅等等幾乎絕跡於茶樓的點心！應該重有其他，不過一時醒唔起，講住咁多先。大家有冇騎呢茶樓食品或經驗分享下？
但係多咗好多新嘢喎，xx奶皇水晶包呀、流沙奶皇包、xx饅頭……
茶樓冇齋鹵味, 但好多齋店仍然有.
貫湯餃,無記錯的話蓮香的貫湯餃是餃包湯不是湯包餃的.
焗布丁以前好少食,但桂花糕就好香,成日叫黎食.
仲有一樣好少有茶樓整的點心,應該係炸粉果.將粉果炸左之後配上湯一齊上,跟蒸的風味完全唔同.
Hahaha「漢堡包、薯條」+ 插多枝國旗… I’ve never heard of such case in 茶樓.
A lot of old stuff is now gone in 茶樓, due to fading traditions and influence from other cultures/restaurants, therefore they have a hard time to keep up unles they do something new. Soon or later they will sadly only be memories for us.
Well, that’s just my opinion.
流沙包,我昨天都有食呀…不過而家d新野無以前咁神奇
我好懷念焗布甸,蛋黃味超濃,加埋西米,中間仲要藏大大舊蓮蓉,方死你唔飽到上心口
話說 要搵d 正正常常既奶黃包都難
宜家好多都加左其他野入去
仲有一樣
唔知點解時下壽包一定要大大個
好記得小朋友時侯 果d細細個既壽包
死火！唔提起都冇咁想食，點算？！
想起細個同屋企人上茶樓，見Ｄ亞姐哎｢西米布甸～熱辣辣嘅西米布甸～｣，叫到嚟一揭起個蓋Ｄ水蒸汽一湧而上~香氣撲鼻,佢又唔同鬼佬凍布甸咁滑嘟嘟，塊皮焗到黑孖孖+嚡拾拾，但一督穿佢Ｄ熱辣辣兼甘香軟滑嘅西米布甸即刻流出嚟，再加埋以前Ｄ香濃甘醇兼焗到半流質嘅正宗蓮蓉(唔係白蓮蓉或而家Ｄ人用埋晒嘅假蓮蓉！)，惗起流口水～
有些舊式酒樓重有,真係好鬼正,勁滿足
拜讀閣下文章, 引爆了零星潛藏的回憶…
記憶中, 在我孩提時代的茶樓還未有點心車, 點心阿姐都是用特製有肩帶的托盤, 盛著數款不同類型的點心, 掛在頸項上叫賣的.
至於齋滷味, 好像還未曾正式登過上大雅之堂? 通常是放於點心車下層, 伴隨著芝麻卷, 煎堆仔等甜點, 籍籍無名, 但又安份守己地等候有心人.
最叫人懷念的, 倒是現在已經型神俱滅的千層糕. 型滅者, 不復當年大件夾抵食, 神滅者, 無論口感味道都較以前遜色.
我都係鐘意舊式奶黃多過咩流沙…
壽包去上海店就有